MOE Learning Languages Newsletter – Samoan Language Week 2018

 

 

 

 

 

 

 

 

 

 

 

 

 

 

 

 

Talofa, talofa, talofa lava.
O le viiga ma le fa’afetai i le Atua e le fa’aitiitia ona o mea matagofie
ma le matalasi ua ia faia. Ae fa’aagatonu se tautalaga i le autu ma le
manulauti o lenei tusitusiga.
E ese le matagofie o tapenapenaga a alo ma fanau mai aoga
maualuluga eseese i totonu nei i Aukilani. Sa fa’ate’ia le va’ai, na
lagona f’o’i le fiafia ma le fa’agae’etia ona o le finafinau o alo ma
fanau ia ina ia fa’aolaola le gagana i totonu o aoga aemaise o lenei
atunu’u.
I le Aso Sa 27 Me, na tatala aloa’ia ai le vaiaso o le gagana Samoa i
le Kolisi o Southern Cross. Na fa’atumulia i aoga eseese, aemaise o
matua i le latou pitola’au o le lagolagosua. Sa matagofie le vaaiga i
lea aso, sa fa’agaeetia foi le to’atele ona o le maualuga o le tulaga na
o’o iai le fa’asoa a alo ma fanau. E moni lava na tutupu ma fananau
a’e i Aotearoa nei, peita’i olo’o tumau pea ia te’i latou le loto o le
finafinau ma le sogasoga ina ia mautu le gagana.
I tapenapenaga o le vaiaso, i totonu o si o’u laumua nei, matou
te fa’amanatu lava ma taumafai e saili se isi ituaiga fa’atinoga e
fa’alauiloa ai le vaiaso. Sa matou tapenaina mea’ai Samoa mo le
malu taeao mai le Aso Gafua seia paia le Aso Faraile, ae le gata i lea
o le fa’amatalaina o nisi o vaega o le aganu’u mo le fa’alauteleina o
le malamalama o nisi o faiaoga mai isi atunu’u.
Ao le aso Faraile 1 Iuni, na tapuni aloaia ai le vaiaso o le gagana
Samoa, ma fa’ailogaina fo’i i le aoga a
teine o le Kalama. Sa va’aia foi le tumu ma
ese fo’i le tapenaga o lea aso. Sa vaevae
i kulupu ma faia ai ni galuega fa’atino
aua le fa’alauteleina o le malamalama o
tamaiti i le oa o le gagana. O se tasi foi
o sui mai le kolisi o Magele sa fa’atino se
solo faitaga e fa’atatau i le autu o le aso e
fa’apea “ Alofa atu nei, alofa mai taeao”
By Jane Malauulu, Mangere College
Alofa atu nei, alofa mai taeao.
Se’eane laia i ou se’etaga malu,
Ae se’i ou tautala e fa’ailo ma toe fa’amanatu.
Le autu po’o le manulauti lele ua fa’ata’atia
O sou manatu ma so’u lagona o le’a folasia.
Le upu alofa e talalasi lona fa’amatalaina,
Le faasamoa, o fa’alapotopotoga, aoga aemaise o aiga.
Ae e fa’amamafa la’u talanoa i le alofa fa’atino i totonu o a’oga,
Le tomai ma le poto salalau lele ua saoasaoa lona fa’aaogaina.
Le alofa fa’aali i totonu o aoga, o le a lona uiga,
Lima foa’i, tautua punoua’i ma lou alofa le fa’atuaoia.
E moni lava o alo ma fanau mai atu motu eseese o le pasefika,
Peita’i o le alofa fa’asamoa e le fa’apito lona fa’atinoina.
O lou alofa fa’aali ma se mea lelei e te faia i totonu o lou
si’osi’omaga,
O le’a le galo lea i o matou loto ma agaga.
I totonu o aoga o se siosiomaga malu puipuia ma toe saogalemu,
O faiaoga i le latou matafaioi o le a’oa’o, ina ia maua le poto e
tautua ai atunu’u.
Alofa atu nei,alofa mai taeao,
Le vaiaso o le gagana Samoa ina ia uli ma sao.
Tama a tagata e fafaga i upu ma tala,
Aua o le Samoa moni lava e tauama i ana tu ma ana aga.
A’o se upu ua le tautamali’i i lau fa’afofogaaga,
Fa’amagalo se leo vaivai o le auauna.
Talosia ia maua se ai o lenei fa’atasiga,
Aua tupulaga fai a’e, ae tainane o nuu, ekalesia ma aiga.
E ese lota mimita ae vaai atu o sagisagi fiafia fanau e fia iloa le ta
gagana, aua fai mai upu a le atunu’u, “A leai se gagana, ua po le
nu’u. O se fa’amatalaga pu’upu’u lena e tusa foi ma lea fa’amoemoe
taua na feagai ai nisi o aoga maualuluga i totonu nei i Aukilani. Ou
te fa’amoemoe i le Tama o i le lagi na te fa’amatala ma fa’apupula
le aoga ma le taua o lea vaiaso i alo ma
fanau i totonu o Niu Sila nei i o outou loto
ma finagalo. Se fai mai e iloa lava le Samoa
i ana tu ma ana aga, a lea na fa’atino e alo
ma fanau ia i lea aso.
Se upu ua le tautamali’i i sau silasila,
fa’amagalo le auauna, leaga fai mai e poto
lava le tautai, ae iai lava le taimi e sasi ai.
Soifua ma ia manuia.
By Hannah Pio, Mangere College

 

 

tabs-top